Par’alhá de séren de l género masculino, de ls conheilhos gostáren muito deilhes, i de botáren froles amarielhas, la maior caratelística que sei de ls Pimpilros, ye que you nun sei dezir l sou nome an más lhéngua nanhue, tirando la mirandesa!

Yá l bicho q’anriba pousa, sei q’eisiste, mas nun sei l nome del an lhéngua nanhue!

Poderemos pensar que nó, mas hai alguns cuidados que ye perciso tener quando tiramos retratos a la frol de l Pimpilro.

Ye que se fur tirada mui d’acerca, puode parecer ua frol de girassol mui grande, i essas froles nun son selbaijes!

Hai siempre grandes peligros que spréitan, i que nien manginamos starmos a correr quando retratamos a las froles de Pimpilros!

Hai giente que nun conhe nien uas nien outras: las pessonas nunca puoden ser anganhadas!

Carlos Ferreira, 2019

Éran ampercípios de júnio. San Pedro quijo ajudar. Truniaba. Chobie que dius la daba. Uas cuordas d’auga que nien lhúrias...

Al meio la Beiga de Samartino, stába un tiu cul motor a regar la huorta... sucos bien chenos!

Diç-le un que passaba:

- À Fracisco, pus chuobe tanto i tu a regar!!

- Nun sou home de quedar an fabor a naide! respondiu-le l tiu.

Durante meses, dies, a cada minuto: cul sachico, cun carino, cun alforraque andeble, cun fresca auga de l poço, sculpimos to ls centímetros de la huorta. Apuis fumos deixando la natureza fazer l sou papel de mai. "Bamos a ber la huorta?!" aperponies-me. "Bamos", respondie you. I quedabamos alhi ls dous a mirar, cumo se to las pormessas de l mundo circulássen andrento la seiba daqueilhes lhegumes, anquanto ls uolhos se fartában, alhenos a to ls problemas de la bida. I sentiemos an nós oupir-se un ourgulho quaije ridículo, al admirar aquel berde medrar, ua spéce de sprança que la huorta habie sembrado an nós!

Agora yá berdégan las quelores de la colheita, i antes de purparar la cena, aperpones-me: “Bamos a ber la huorta? Bamos a buscar un tomate?! “Bamos”, respondo you. I quedamos alhi un cachico a mirar pa l’oulibeira bielha, cumo s’aquel fusse l nuosso ritual oubrigatório, antes d’antrar pula satisfaçon de ls sabores de la cena.

I miramos un pa l outro, porque gostariemos d’ambentar felcidade más resbelgada, que nun fusse assi tan ridícula...

Carlos Ferreira, 2019

Las cascas ye un freijon que dá muito trabalho: sembrar, scabar, regar, apanhar, tirar las bainas, purpará-las i secá-las.

Ye por esso que son tan buonas cozidas cun botielho i regadas cun azeite.

Esta ye la malta de la mie rue que mais cascas cuolhe, por esso tengo muita proua por séren mius bezinos de Rue la Frauga.

ARRIMAI-BOS AL CIELO