Neste tiempo an que l cherrelhon s’abrana, ten-me anfastiado algue tinta caçurra que chiçca las redes: aterlundando eimigrantes/çfendendo eimigrantes, zimbrando lhapadas, ouliando senreiras, gulsiando zízaras…

Apuis de la mie maior eidade, yá morei d’afetibo cinco anhos an Lisboua, quinze an Paris i binte por Tierra de Miranda: quando nacimos anfrisgados na penúria, por to l lhado ye duro ganhar la bida; por to l lhado hai giente buona i mala, a las dreitas i zabumba, nabineira i zbaçada, a falar scorreito i ataramelado…

Yá ye este l sigundo anho an que Pertual ye eileito l melhor çtino turístico de l MUNDO, l terceiro an que ye l melhor d’Ouropa. Tengo un filho, muita família, muitos amigos eimigrantes, i an Pertual, tal cumo you, assi le passa a to la giente: hai que los recebir a todos bien, culs sous defeitos i culidades, culas sues çfrenças, culs braços abiertos, ancandilando-mos culs sous sonidos calientes, las sues falas resbelgadas, lhabando ls uolhos culs sous galanos carros, cula guapura de ls sous coloridos aldraijes. Afinal eilhes solo stan a buolber a sue casa!

Las suidades son un malina q’ataca por tol lhado, cad’un cumo cad’un, cada qual cumo cada qual: hai siempre lhugar para mais un, hai siempre lhugar para todos, hai siempre lhugar pa l’amisade, mormente ne l interior adonde tenemos tanto lhugar, i ls pertueses yá somos ls melhores de l mundo a recebir, dende palantre, yá nun poderemos passar! Que téngan buona biage i que séien todos bien benidos.

YOU YÁ STOU CHENO DE SUIDADES, CUN GANAS D’ARREGALAR ARROCHADOS ABRAÇOS A QUIEN MOS BENIR A BEJITAR.

Carlos Ferreira, 2019

Nun ténen ls antramoceiros miedo de se matizáren cun las papoulas: azules i burmeilhos a fazéren eiquipa para zafiar l cielo! Ye berdade que l berde de las yerbeiras ye quien los arrebata pa patacones que los çpégan de l suolo. Mas ne l que toca a las filosofies de las quelores, nun hai que mos squecir: siempre ls burros fúrun ls comedores de to ls berdes: nun ye fácil que déixen la spránça medrar!!

Carlos Ferreira, 2019