L CEMAQUE

L CEMAQUE

La Rhus coriaria, ye ua de las planta q’inda hoije s’ancontra muito ne l termo de la Terra de Miranda, i q’ancerra neilha las quelores más fantásticas de l outonho.

Chamada cemaque an mirandés, sumagre an pertués, zumagre an castelhano, ye un de ls arbustos conhecidos que mais taninos cuncentra neilha. Ye tamien conhecida cumo árbole de ls curtidores, porque era mui ousada para l’andústria mediabal de curtir pieles. L sou nome cemaque benirá de l árabe summâq, que parece tener benido de l arameu sum(m)aqa, que quier dezir ‘burmeilho’, por bias de la quelor de las sues fuolhas i de l sou fruito.

La palabra yá stá decumentada na forma screbida zde l seclo X i an cuncreto la forma mirandesa çumaque yá stá decumentada zde l sieclo XIII.

Tamien s’usa l berbo ancemacar an mirandés, referido-se a pessona que come muito.

Até hai pouco tiempo, esta planta inda era ousada para tenhir, subretodo la lhana para fazer pardo i burel.

Inda hoije hai muito cemaque pul termo de la Tierra de Miranda, porque se mantubo la sue cultura mesmo apuis de tener acabado la curtimenta de pieles, porque apuis de trilhado i ansacado, era bendido para Carçon i Argoselo adonde se mantubo até als anhos 70 de l seclo XX, ua andústria artesanal de curtimienta de pieles an Trás-ls-Montes.

Agora yá solo angalana las nuossa paisaijes d’outonho, l que yá nun ye assi tan pouco!

 

   12 de setembro, 2019
Eiducaçon