LHIENDA DE L NINO JASUS DE LA CARTOLICA

LHIENDA DE L NINO JASUS DE LA CARTOLICA

Mandaba ne l mundo d’anton, l “Grande Rei Sol”, Luís XIV de Fráncia i Nabarra, l monarca q’habie de reinar mais anhos de to ls tiempos. An Pertual, Don Juan V l “Magnánimo”, acababa de suceder a Don Pedro II l “Pacífico”. An Roma mandaba l ducentésimo quadragésimo terceiro Papa, Clemente XI, i an Miranda de l Douro bibie l sou décimo nono bispo, Don Juan Franco d’Olibeira. Carlos II, l “Anfeitiçado”, q’apesar de ser un mentecapto de la cunsangrinidade fui rei de Spanha i de l sou grande ampério d’alén mar, morrie-se ne l anho de 1700 sien deixar hardeiros. Acabában-se assi an Spanha ls reinados de la dinastie de ls Habsburgos de la casa d’Áustria i ampeçában ls reinados de la dinastie de ls Borbones de la casa de Fráncia. Cumo las mudanças an mandos tan amportantes nunca se fázen sien peleias, antre 1701 i 1714 la guerra de la Sucesson alhastrou por to l’Ouropa. Purmeiro Pertual apuiou la Fráncia i ls Borbones, mas apuis assinemos l tratado de Methuen i passemos a apuiar l’Anglaterra i ls Habsburgos. Resultado desta mudança: guerra cun Spanha i Fráncia. I siempre q’hai guerra antre Pertual i Spanha, ls purmeiros a lhebar na cabeça son siempre ls mirandeses.

Ua de las más amportantes praças militares raianas, Miranda de l Douro, fui circada i sitiada pulas tropas castelhanas a 11 de márcio de 1711. Ls dies éran cada beç más penosos i custosos d’aguantar. Andrento las muralhas acabórun-se las probisiones, l’auga ampeçou a scassear i a tener cada beç más mala culidade. Muitas malinas ampeçórun a alhastrar, ls refuorços de las tropas pertuesas nun chegában, l pobo antrou an zánimo total. La muorte i l diabro tomórun cuonta de la cidade, mas desta beç Dius nun se squeciu de Miranda. Para benir an sou aussílio, anquando abaixaba pula rebalina dun raio de sol, fizo-se Nino Jasus i çfarçou-se cun aldraijes de fidalgo cabalheiro. Assi q’aterrou, ampeçou lhougo a correr pulas muralhas i pulas rues tal un pelubrino d’aire, anquanto gritaba:

- A eilhes, a eilhes. Ánimo balientes mirandeses. Ounidos scamugimos spanholes i diabros. Nós somos más fuortes q’eilhes: arriba mirandeses, arriba Miranda…

A soutrodie yá belzebu salie a la rue pa l’atalancar ls caminos, mas l Nino era mais guicho, i a cada hora demudaba la quelor i ls aldraiges para anganhar l demónho: berde, burmeilho, amarielho i dourado; cun capa d’honras, bestido de bispo, de fidalgo, general i suldado, anquanto gritaba por to lhado:

- A eilhes, a eilhes. Ánimo balientes mirandeses. Ounidos scamugimos spanholes i diabros. Nós somos más fuortes q’eilhes: arriba mirandeses, arriba Miranda…

I l ánimo tomou outra beç cuonta de Miranda, i un eisército de mirandesas i mirandeses saliu de sues casas armados cun fouces i gadanhas, choupas i spingardas, ferragachos i artimanhas, anquanto gritában:

- A eilhes, a eilhes. Ánimo balientes mirandeses. Ounidos scamugimos spanholes i diabros. Nós somos más fuortes q’eilhes: arriba mirandeses, arriba Miranda…

I a la fin de siete dies i siete nuites, al quemando de la boç de l brabo Nino, l pobo de Miranda scamugiu la muorte, ls spanholes i ls belzebus. I ls refuorços de las tropas pertuesas chegórun. Miranda staba salba: MILAGRE.

Cumprida la sue mission, l Nino Jasus chubiu-se ne l purmeiro raio de sol de l’alborada até al cielo. Nunca más naide lo tornou a ber.

Mas l pobo de Miranda, que nunca soube bibir sien honra nien sien gratidon, amanhou un altar ambidraçado na sue Sé, i andrento puso l’eimaige que mandou fazer al sou brabo Nino Jasus. I bestiu-lo cun ls más galanos fatos que soubírun fazer: berdes i burmeilhos, amarielhos i dourado; capa d’honras, bestimienta de bispo, fidalgo, general i suldado…

Pa que pulos seclos de ls seclos, nunca l mundo se squeça de la balentie daquel Nino q’agora ye de Miranda.

I más de cien anhos apuis, alguien l’oufereciu ua cartolica negra pa fazer la sue cabecica más burguesa. I to ls anhos sale an procisson, lhebado an ombros pu ls ninos de coraçon.

I ye esta la bielha lhienda que cuonta l milagre de l Nino Jasus de la Cartolica: quien la sabe que la cuonte i quien nó, que la daprenda.

 

   12 de setembro, 2019
Eiducaçon