Daprender Mirandes

Ne l blog, porsores i alunos puoden ancontrar cuntenidos relacionados cula bida, l patrimonho i la cultura mirandesa.

L NASO

L NASO

Ye tiempo de Naso, ye tiempo de trocar de burra...

Ousai, ousai arrimar-bos al cielo…

 

   13 de setembro, 2019
Tiempos libres  
LHUÇ

LHUÇ

Able lhebanta-se la cisca alborada pul Cabeço la Lhuç: entra l sol an Pertual feito Senhora. Acáchan-se las nubres a adundiar l ocre melado de ls belhotros de las xaras granadas, quaije a zapertar ls alcorchetes de l snubrineiro ralo, tal ua einauga que zbolaixa cumo gabilan…

Stá inda ambelesado l çcampado Praino. Ampláchan las urzes l sou reixado berde. Ancachéiran-se d’albaiada las splanchadas bainas de las scobas: nien un airico bulhe; nien un germo se sinte!

Ampalpo l nuosso matorral a faceirar bida: streforma carbono an oucigénio…

Relhúzen dóndio amarielho las angúrrias de ls restrolhos. Acubílhan las cucrutas sous beneiros cun pestanhas de fenascos. Ressóna l bolo dun gurrion paçpalhaç…

Yá reçuma alfa la piçarra. Yá s’ampéçan a spargir oulores d’ourieganos cumpridos. Stan stujosas las yerbas pa l ganado que cincérria an dreito a l’ourrieta…

…i chúben-me uas quelubrinas la spina arriba, solo cula cungeminaçon de que un stermúndio fumo puoda ir a abisar un qualquiera scaldado lhagarto alcobiteiro…

Carlos Ferreira, 2019

   12 de setembro, 2019
Tiempos libres